تۆ بگه‌ڕێ به‌ پانتایی گشت دونیایه‌

 بزانه‌ چ بوونه‌وه‌رێک قژی بۆنی عه‌تری لێ دێ و

 سینگی میوه‌ی عه‌شقی تیایه ؟ ‌

پرسیار بکه‌ بزانه‌ کێ ئه‌وه‌نده‌ی ئه‌و خۆشه‌ویستی له‌ چاوانیدا ده‌بارێ و

 هه‌ست و سۆزی له‌ دڵ دایه؟ ‌

سۆراخ بکه‌ بزان ماڵ کێی لێ نه‌بێ وه‌ک زیندانه؟‌

بزانه‌ شار کێی لێ نه‌بێ شه‌قامه کانی وێرانه؟

سرنج بده‌

له‌ جێ ژوانا

ئاهوی فڕیو

پێکه‌نینی قه‌تیس ماو و

شه‌کری شه‌رمی به‌سه‌ر ده‌موچاودا وه‌ریو

گۆنای تەزیو

چ دیمه‌نێکی جوانه‌

 ‌ به‌ خۆت بڵێ کێ هه‌یه‌ وا بێ لوتفی ئه‌و گوزه‌ر بکا

 کێ وه‌ک و ئه‌و میهره‌بانه؟‌

 من ده‌زانم تۆش هه‌روه‌ها بۆ هه‌مووان

 " گه‌وره‌ و منداڵ "

باوه‌شی ئه‌و خۆشترین شوێنی جیهانه.

 هاکا ده‌رکه‌وت تین و تاو و

 بازنه‌ی زه‌ردی هه‌تاو و

 سه‌رچاوه‌ی سۆز و وه‌فا و

 په‌ڕپه‌ڕه‌ی گوڵی سوربا و و

بۆنی مێخه‌کی سه‌رداو و

 دیقه‌تی پڕ جوانی چاو و

ڕێژنه‌ی بارانی به‌تاو و

 هاژه‌ی ئاو و

سه‌وزی چیمه‌ن و لاو لاو و

 هه‌زار ڕه‌نگی تیکه‌ڵاو و

 مه‌رهه‌می دڵی سوتاو و

 هه‌ناسه‌ی قووڵی هه‌ناو و

هاکا ده‌گا و

 دڵ و ده‌رونم خۆش ده‌کا و

 سه‌رمه‌ستی خه‌یاڵم ده‌کاو و

 خه‌ممم ده‌باو و

 خه‌نیم ده‌کاو و

ده‌مێنێت و ئیتر ناڕوا

 هاکا ده‌رکه‌وت دیسانه‌وه‌ وه‌ک و جاران

 دایکرده‌وه‌ سۆز و جۆشی وه‌ک و باران

 غه‌رقی کردم شه‌پۆلی شاڵاوی شێتی

 ده‌ستی گرتم ده‌ری کردم له‌ نێو گێژاوی به‌دبه‌ختی

 حه‌سامه‌وه‌ گه‌ڕامه‌وه

‌ نیو باوه‌شی میهره‌بانی

 گه‌شامه‌وه‌

 به‌هاتنی ساته‌ وه‌ختی

ده‌ڵین گوایه‌

 له‌و دونیایه

 ژنێ بۆنێ سێوی لێبێ ئه‌وه‌ جێگای ئاگردانه‌

 پرچی ڕه‌شی ده‌سوتێن

هه‌ڵیه‌واسن به‌ زمانا

 ده‌ڵێن گوایه‌ هه‌رژنێ لێوی خشیبێت له‌ لێوی پیاو

 یاخود سۆزی پڕ له‌ حه‌زی دیبێ به‌ چاو

 ئه‌وه‌ وه‌ک و کافرانه‌

 مه‌مکی پڕی ده‌بچڕێنن

 پێستی ناسکی ده‌برژێنن

 له‌ ئاگردا ده‌ی پیشێنن هه‌تا زه‌مانه‌ زه‌مانه

‌ ئه‌ی خوایه

‌ ئه‌گه‌ر وایه

‌ تۆ چۆن هاتی تا مرێمت له‌ خشته‌ برد

 ئه‌ی چیت لێ کرد

 مه‌گه‌ر خۆتیش هه‌ر وه‌کو پیاو

هه‌وه‌سی هه‌زار ساڵه‌ی خۆت به‌تاڵ نه‌کرد به‌ پڕ و تاو

 ئه‌ی تۆ عیسات نه‌خسته‌وه‌

 سینگی ژنت نه‌ لسته‌وه‌

 بۆده‌بێ تۆ تا بمێنی

 له‌ گڵدا گوڵ بسوتێنی

 داد په‌روه‌ریت سه‌ر و بنه‌

 دژی ژنه‌

 سه‌ره‌و ژێر بێت ئه‌و دادگایه‌

 وا سوتانی ژنی تیایه‌

ده‌ی گیانه‌ بێ و دڵی وێرانه‌م چاک که‌وه

‌ ڕوحی ناسۆرم شاد که‌وه

‌ زه‌ینی کوێرم ڕوناک که‌وه

‌ خه‌یاڵی لێڵم پاک که‌وه

‌ ده‌ی گیانه‌ بێ ده‌ی گیانه‌ بێ و فریام که‌وه

‌ ده‌رگای ئومێدم لێکه‌وه‌ قه‌ره‌بووی ژیانم که‌وه

‌ تێکهه‌ڵچوونم ئارام که‌وه

‌ ده‌ی گیانه‌ بێ و بۆ ساتێکیش دوا مه‌که‌وه‌

 به‌ شه‌وقه‌وه‌ به‌ره‌و باوه‌شی سۆز به‌وه

‌ ئاوێزانی عه‌شقم که‌وه

‌ ئیتر مه‌ڕۆ هه‌رگیز مه‌ڕۆ فورسه‌خێکیش دوور  مه‌که‌وه‌‌

 بێزار ئه‌بم

 که‌ دوریت لێم

 ده‌نگت ناگات

 بڕوات دێ پێم

 ئه‌گه‌ر بڵیم

 جه‌سته‌یه‌کی بی گیانم و رۆحم بۆلات سه‌فه‌ر ده‌کات

 ئه‌زانی چه‌ند ناڕه‌وایه‌ له‌وێ نه‌بی که‌ ڕۆژ هه‌ڵهات

 تا پێت بڵێم ئازیزه‌که‌م به‌یانیت باش

 ئه‌زانی جه‌ند ناحه‌قیه‌ سه‌رت له‌ سه‌ر سه‌رین نه‌بێ که‌ شه‌و ده‌گات

 بۆیه‌ دوریت زامێکی سه‌خت و به‌سۆیه‌ و

 ڕه‌ونه‌قی چاوانم ده‌بات.

بیرت دێ؟

 تۆ بیرت دێ که‌یه‌که‌م جار دیقه‌تت دام

 منیش ڕامام

 تۆ وات زانی گرێیه‌کم له‌ دڵ دایه‌وه‌ و

 منیش هه‌روا

 نه‌مان زانی که‌ پێکه‌وه‌ سه‌فه‌ری ژیان ده‌که‌ین و

 به‌دیار عه‌شقی سه‌وزمانه‌وه‌ ده‌بینه‌ په‌پوله‌ و چراغ

ئێواران‌

 شه‌پۆلی عه‌شق به‌سه‌ر باڵه‌کانی شه‌وه‌وه‌ ده‌گه‌ن و

 کونج و که‌له‌به‌ره‌کان پڕ ده‌که‌نه‌وه‌ له‌ سۆز

 له‌ وێدا نه‌ جێگا و نه‌ کاتێک ده‌مێنێته‌وه‌ بۆ نه‌سیمی هه‌ناسه‌ ‌ و

 نه‌ چپه‌یه‌ک ده‌بێته‌ میوانی که‌س

 وه‌ختێ چراکان خامۆش ده‌کرین

 دونیا وه‌ک خۆی لێ دێته‌وه

‌ ماڵه‌کان ده‌بنه‌ کانی نهێنی و

 جه‌سته‌کان شه‌که‌ت ده‌بن و حه‌زه‌کان مه‌ست

 ئیتر ته‌نهاو ته‌نها ئه‌ستیره‌کانن که‌ ئیشکی ئه‌ندێشه‌مه‌ندانی بی خه‌وی ده‌گرنه‌ ده‌س

 خودایه‌ ئه‌گه‌ر هه‌ی

 دیقه‌تێ و

 په‌نایه‌ بۆ ئیمه‌ش

 له‌ حزورتا له‌ په‌ڕه‌ی ئاو ناسکترم

 به‌ر نه‌نه‌شته‌ری ووشه‌ت ناگرم

 که‌ هه‌ڵئه‌چی نه‌ ئه‌توانم شه‌ڕکه‌رێکی قاره‌مان بم

 نه‌ ئه‌توانم سه‌نگه‌ر بگرم

 گه‌ر ده‌ته‌وێ کوده‌تا که‌ی

 له‌ سه‌ر کورسی دڵت لام به‌ی

 ته‌نها ڕۆژێ زویر به‌ لێم

 نه‌ک هه‌ر ئه‌ڕۆم

 به‌ڵکوده‌مرم بڕوا

 بکه‌ یه‌کسه‌ر ده‌مرم ‌

ئه‌ی دایه‌ گیان !

 له‌و جیهانه‌ فراوانه‌ په‌نا بۆ چی لایه‌ به‌رم

 که‌ تۆ نه‌بیت

وه‌ک و هه‌ور

 وه‌ک و سیبه‌ر له‌ سه‌ر سه‌رم

 کێ هه‌یه‌ وه‌ک تۆ به‌خشنده‌

 وه‌ک و تۆ گه‌وره‌ و میهره‌بان

 چاوه‌کانی ده‌ریا بن

 و ده‌سته‌کانیشی خۆره‌تاو

 له‌و جیهانه‌ فراوانه‌ په‌نا بۆ چی لایه‌ به‌رم

 که‌ تۆ نه‌بیت وه‌ک و هه‌ور

 وه‌ک و سیبه‌ر

 له‌ سه‌ر سه‌رم

 ئه‌گه‌ر دونیا باخچه‌یه‌ک بێت تۆ ته‌نها گوڵی ڕازاوه‌ی

 ئه‌گه‌ر ژیان شه‌وگارێک بێت تۆ ته‌نها مۆمی گه‌شاوه‌یت

 له‌و جیهانه‌ فراوانه‌ په‌نا بۆ چی لایه‌ به‌رم

 که‌ تۆ نه‌بیت وه‌ک و هه‌ور

 وه‌ک و سیبه‌ر له‌ سه‌ر سه‌رم

 ئه‌ی دایه‌ گیان بێ تۆ ژیان بێ مانایه

 نه‌ ئارامی و نه‌ ئامێزی پڕ خۆسه‌ویستی تیدایه‌ ‌

 له‌و جیهانه‌ فراوانه‌ په‌نا بۆ چی لایه‌ به‌رم

 که‌ تۆ نه‌بیت وه‌ک و هه‌ور وه‌ک و سیبه‌ر له‌ سه‌ر سه‌رم

یادگاری!

 له‌م وڵاته‌ له‌ هه‌ر جێیه

‌ له‌ ژێر چه‌تری وێستگه‌کاندا

 له‌ بازاڕا

 له‌ ڕه‌فی دوکانه‌کانا

 له‌ په‌نجه‌ره‌ی ماڵه‌کانا

 گوڵی لێیه

‌ منیش یادتم به‌ به‌هارێ چواندوه‌

 روخسارت به‌ گوڵێکی سوور

له‌به‌ر ئه‌وه‌

له‌ هه‌ر کوێیه‌

 له‌ هه‌ر ڕێیه‌ بۆ من

 یادگاریه‌کی تۆی لێیه‌

سوتان !

 بڵێشه‌ی ئاگرێک دوێنێ شه‌و ماندوو بوو ڕکشا

 پاینی خۆی سوتان

 شه‌پۆله‌ شێتۆکه‌ی ده‌ریایه‌ک له‌ خۆشی مانگه‌شه‌و پێکه‌نی

 که‌ناری خۆی خنکان

 منیش بۆت ته‌مه‌نم کرده‌ گوڵ

 ژیانیش به‌ باخچه‌

 که‌چی خۆم هه‌ڵوه‌ریم پێش وه‌رزی گوڵستان

. 3.8.99

 چه‌تر

 هه‌ر ڕۆژێ دێ ده‌مرم

 له‌ جێگای تۆ ده‌ستی مردن ده‌گرم

 شادمانم که‌ تائێستا

 خۆشه‌ویستیت به‌رز ڕاده‌گرم

 ‌تا ته‌مه‌نیش ڕێگه‌م ده‌دا

 بۆ تۆ ده‌بم

 دڵنیا به

‌ ‌ ئه‌گه‌ر زه‌وی هه‌ڵت نه‌گرێ

 له‌ دڵما حه‌شارت ده‌ده‌م

 له‌ چاوانما هه‌ڵت ده‌گرم;

.

وا مه‌زانه‌

 وا ده‌زانی خۆسه‌ویستیم وه‌ک باڵندی کۆچه‌ریه

‌ له‌ گه‌ڵ وه‌رزا دێت و ده‌چێ

 یان شه‌ماڵی به‌یانیه‌

 که‌ سوری دی ئیتر سه‌مای له‌ بیر بچێ

خۆشه‌ویستیم وه‌ک بارانه‌ لێوی زه‌وی ته‌ڕ ده‌کات و سوکنای خاک ده‌شکێنی

 وه‌ک ئاسمانه‌ رۆژ و مانگ ئه‌ستێره‌کان ده‌خاته‌وه‌ و

 تینی گه‌رمای ده‌به‌خشێ

 وه‌ک‌ وه‌ ڕوباره‌

 تنۆک تنۆک

 هه‌رکاتێ تۆ مه‌یلت لێ بێ

سوجده‌ ده‌با و له‌ حزورتا دێته‌ سه‌رچۆک

چیت لێ بکەم

 کە هەست ناکەی هەڵدەقرچێم بۆ ڕوناکیت

 ئاگات نیە لە ئازارم

 لێم بێ باکیت

چیت بۆ باسکەم

 کە تۆ دێرێک لەو چیرۆکەت لە بەر نیە

 وا ئێمەی بە یەکتر ناسان

 ئەو داستانەت بیر چۆتەوە

 وا پێکەوە یەکەمین مۆممان داگیرسان

 چیت پێ بڵێم

 کە تی ناگەی لە زمانێ

لە گوڵ کاڵتر هیج نازانێ

 بڕۆ خانم

 دونیا هەموو ژیر و ژوور کە

 زۆر بگەڕێ لێرە و لەوێ

 دڵنیا بە

 هیچ کەسیکیت پێ شک نایە

 ئەوەندەی من خۆشی بوێی

مۆی*

 مۆی هه‌زار جار مۆی

که‌ تۆ سه‌ڵاوم لێ ده‌که‌ی

 واده‌زانم به‌و لێوانه‌ت که‌ شیرینن شه‌کر ده‌خۆی

کچێ له‌ قژت عه‌تر ئه‌بارێ

 له‌ چاوانت خۆشه‌ویستی

 میهره‌بانی له‌ سیمات و

 له‌ ده‌نگتدا ئاواز و نه‌ی

 ***

 هه‌زار جار مۆی

 هه‌ر که‌ تۆ دێی

 ژیان تامی تری هه‌یه‌

 سروشت ڕه‌نگێ تر ده‌به‌خشێ

 جا نازانم هی ئه‌وه‌یه‌ خۆشم ده‌وێی

 یان تۆ هه‌ر خۆت به‌ تام و بۆی

 ***

 من میوانی سه‌ر سفره‌ی تۆم ئه‌م ئیواره‌

به‌ڵین ده‌ده‌ی

له‌ شه‌رابی کوڵمی ئاڵ و

نیگای چاوت لێوم ته‌ڕکه‌ی

به‌ڵێن ده‌ده‌ی

ته‌نیا جارێ ئه‌م دروێشی ڕێگای عیشقه‌

به‌ عیشوه‌ی ناز سه‌رمه‌ست بکه‌ی

یاخود دیسان

حه‌زه‌کانم پشت گوێ ده‌خه‌ی؟

_____________

*مۆی به‌ فنله‌ندی واته‌ چۆنی

 ئه‌و پێی وایه‌ من چاره‌ی ده‌که‌م

 من پێم وایه‌ خۆم پێویستم به چاره‌یه‌

 گه‌ر بزانێ خۆم بیمارم

ئه‌و پێم ده‌ڵێ چ کاره‌یه

 که‌ده‌زانێ به‌ته‌نیام من له‌م شاره‌دا

 که‌ چی نایه‌ بۆ سه‌ردانێ ئێواره‌یه‌‌

خۆ ده‌زانێ چیه‌ ده‌رمانی ده‌رده‌که‌م

به‌ڵام نایکا

عه‌جه‌ب ماوم له‌م کاره‌یه‌

ره‌نگه‌ عیلاجی ئه‌و گران که‌وێ

 یان به‌مشتی پاره‌یه‌ وه‌لێ

 ده‌رده‌که‌ی من سه‌خته بێ ئه‌و

 بێ سوده‌ و بێ چاره‌یه.

خۆزگه‌ ئه‌و خوایه‌ ژن بوایه‌

یادێک

سه‌ری ساڵه‌و

شه‌وانی پڕ  خۆشه‌ویستیم دێته‌وه‌ یاد

ئه‌و ده‌مانه‌ی ‌که‌ یه‌کی یه‌ک

باوه‌شێک له‌ به‌رداڵاندا ده‌یگوشیم وبارانی سۆزی ده‌باراند

***

چاوه‌ڕوانیم کوژایه‌وه‌

لێره‌ به ‌دوا ‌‌ده‌رگا بۆکه‌س واڵا ناکه‌م

که‌ سێ نیه‌ پڕ به‌دڵی له‌ ئامێزی خۆیم بگرێ وماچم بکات

که‌سێک نیه‌ وه‌ک و تۆ بێ 

 بۆنی هه‌زار عه‌تری لێ بێ و

رۆحم شاد کات.

دیاریه‌ک بۆ سه‌رئ ساڵ !

پیرۆز بای چیت لێ بکه‌م

که‌ ده‌زانم له‌ شه‌وانی زیندویتا مۆمیکی تر ده‌کوژێته‌وه‌

وه‌رزێکی تر له‌ ته‌مه‌نت که‌م ده‌کات وبه‌ره‌و عه‌ده‌م ده‌چیته‌وه‌.

*** *** ***

من بێزارم له‌و ڕۆژانه‌ی که‌ ساڵێ پر ده‌که‌یته‌وه

‌لاپه‌ڕیه‌ک ده‌دڕیت و یه‌کێکی تر ده‌که‌یته‌وه‌.

*** *** ***

کاشکا ژیان پێچه‌وانه‌ی ئێستا بوایه

‌که‌ هه‌رساڵێ ده‌هاته‌ پێش به‌هارێ تر بۆ عومری تۆ بهاتایه

‌نه‌وه‌ک زه‌مه‌ن هێواش هێواش له‌ ته‌مه‌نت بقرتێنێ

ڕۆژێک دابێ و گوڵێ هیوات هه‌ڵوه‌رێنێ

تاوانباره‌ ئه‌و سروشته‌ی که‌وا مرۆڤ ده‌خاته‌وه 

‌که‌وا عه‌شق ئاوێزانی غه‌م ده‌کات

وده‌یباته‌وه‌.

سروت

وامان کرد عه‌شقمان پیرۆز بێت

 تا ئاستی په‌رستن

جێ ژوانمان په‌رستگای ئه‌وین بێت

نزامان بۆ یه‌ک بوون

زه‌کاتی ساڵانه‌و نوێژ کردن نه‌ک جارێ

سه‌دان جار به ‌ماچێ ئه‌دامان ئه‌کردن

ئه‌و قیبله‌ نازداره‌ی خوای جوانی ماڵێ بوو

کردمانه‌ قۆناغمان  تا مردن

سروتێ گرتمان له‌ ڕێگای حه‌زمانا

دڵنیام به‌هه‌شتی به‌رینی ئاخیره‌ت

فه‌رشه‌که‌ن له‌به‌رده‌م پێمانا.